| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 9.9 | Dem. 9.14 (English) | >>Dem. 9.17 |
9.12καὶ μὴν καὶ Φερὰς πρώην ὡς φίλος καὶ σύμμαχος εἰς Θετταλίαν ἐλθὼν ἔχει καταλαβών , καὶ τὰ τελευταῖα τοῖς ταλαιπώροις Ὠρείταις τουτοισὶ ἐπισκεψομένους ἔφη τοὺς στρατιώτας πεπομφέναι κατʼ εὔνοιαν · πυνθάνεσθαι γὰρ αὐτοὺς ὡς νοσοῦσι καὶ στασιάζουσιν , συμμάχων δʼ εἶναι καὶ φίλων ἀληθινῶν ἐν τοῖς τοιούτοις καιροῖς παρεῖναι .
9.13εἶτʼ οἴεσθʼ αὐτόν , οἳ ἐποίησαν μὲν οὐδὲν ἂν κακόν , μὴ παθεῖν δʼ ἐφυλάξαντʼ ἂν ἴσως , τούτους μὲν ἐξαπατᾶν αἱρεῖσθαι μᾶλλον ἢ προλέγοντα βιάζεσθαι , ὑμῖν δʼ ἐκ προρρήσεως πολεμήσειν , καὶ ταῦθʼ ἕως ἂν ἑκόντες ἐξαπατᾶσθε ;
9.14οὐκ ἔστι ταῦτα · καὶ γὰρ ἂν ἀβελτερώτατος εἴη πάντων ἀνθρώπων , εἰ τῶν ἀδικουμένων ὑμῶν μηδὲν ἐγκαλούντων αὐτῷ , ἀλλʼ ὑμῶν αὐτῶν τινὰς αἰτιωμένων , ἐκεῖνος ἐκλύσας τὴν πρὸς ἀλλήλους ἔριν ὑμῶν καὶ φιλονικίαν ἐφʼ αὑτὸν προείποι τρέπεσθαι , καὶ τῶν παρʼ ἑαυτοῦ μισθοφορούντων τοὺς λόγους ἀφέλοιτο , οἷς ἀναβάλλουσιν ὑμᾶς , λέγοντες ὡς ἐκεῖνός γʼ οὐ πολεμεῖ τῇ πόλει .
ἀλλʼ ἔστιν , ὦ πρὸς τοῦ Διός , ὅστις εὖ φρονῶν ἐκ τῶν ὀνομάτων μᾶλλον ἢ τῶν πραγμάτων τὸν ἄγοντʼ εἰρήνην ἢ πολεμοῦνθʼ αὑτῷ σκέψαιτʼ ἄν ; οὐδεὶς δήπου . ὁ τοίνυν Φίλιππος ἐξ ἀρχῆς , ἄρτι τῆς εἰρήνης γεγονυίας , οὔπω Διοπείθους στρατηγοῦντος οὐδὲ τῶν ὄντων ἐν Χερρονήσῳ νῦν ἀπεσταλμένων , Σέρριον καὶ Δορίσκον ἐλάμβανε καὶ τοὺς ἐκ Σερρείου τείχους καὶ Ἱεροῦ ὄρους στρατιώτας ἐξέβαλλεν , οὓς ὁ ὑμέτερος στρατηγὸς κατέστησεν .
9.15
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 9.9 | Dem. 9.14 (English) | >>Dem. 9.17 |
